是否記得早前講過美國於去年8月推出升級版GR Corolla，今日就輪到日本推出這個升級版本，今次推出的升級版，包括追加一款八速自動版本，正式同GR Yaris睇齊，而家連GR Corolla都有揀自動波，不過除非你只得自動波A牌，否則打死都一定買手波。除了這樣之外，其實車櫳入面都經過全面升級，包括換上Ultrasuede物料的軚盤、波棍頭（自動波同手波）、手掣等，同時車內飾件亦全部換上黑色設計，安全帶亦跟埋紅色。不過重點是機械上的升級，而且唔單只新車有得升，即使你部是舊款（GR Corolla）一樣可以去零件部買件升級。說回今次升級部份，包括剛性更強的軚芯螺絲（提高直線加速的穩定性）、強化底擔螺絲（改善轉向反應）、頭尾避震機加入回彈彈弓（改善轉彎穩定性），以及縮細尾防滾桿直徑和改配疏密圈彈弓，藉此提升操控表現。新車預計3月3日正式在日本上市，現時已接受認購，想快人一步有車，就快快搵水貨商幫手。
