兩個月前，我們講過奧迪部小改新版RS3，以7分33秒123的成績破了同級車在紐布靈的最快圈速紀錄，當時那部仍然是滿佈偽裝的測試車，而新版終於在日前推出。一如先前所講，眼前所見屬於中期小改款版本，外觀大致和現行版本一樣，不過車頭黑色鬼面罩size比前更加巨型，同時亦修改了入氣口設計，可以令更多空氣進入引擎艙入面。另外，頭尾燈組合亦稍作修改，令它的外形有更大新鮮感。
不過重點都是機械部份，雖然同是那台2.5公升五缸turbo引擎，馬力及扭力輸出分別係400匹及500Nm，但能夠在紐布靈造出最快圈速，除了靠性能輸出外，操控亦是主要關鍵，所以車廠為這部小改新版RS3換上全新扭力分配器，同時將後差速的參數重新設定，令新車可以用更高速度入彎，以及減少轉向不足出現。不過，就未知香港幾時會見到這款新車出現了！
