平治E-Class呢類中級行政房車始終係唔少商務人員嘅第一選擇，空間闊落之外，揸出來見客或接待客人比SUV體面。近日平治電動車EQE來港，當然要搞返個速讀班畀大家認識下。
現時全球汽車界都患上SUV大流行症，電動車市場有唔少SUV選擇，反而純電行政房車就好少見。相信都有好多人關心今次平治EQE來港，速讀班正式開課。
平治電動車嚮香港有咩揀？
先睇返平治喺香港嘅電動車家族，成員已經慢慢齊腳，SUV型態有EQA、EQB、EQC三款，豪華房車有上年到港嘅EQS，商用車有eVito啱啱出爐。今次主角EQE係繼EQS之後，第二款建基於EVA2電動車專屬模組底盤嘅型號，呢個底盤係真真正正由零開始專門為電動車而開發。
EQE點解個樣同E-Class好唔同？
既然EQE車頭冇咗副引擎，再加上用全新EVA2電動車專用底盤，如果造型跟返E-Class或傳統房車未免太守舊，仲浪費咗好多車頭空間。EQE將傳統方正及長車頭房車外形改變，短短前懸及圓潤車頭幫忙減低風阻之外，未來感嘅跑味順手增加。細心留意下，EQE車尾裝有尾翼，19-21吋車鈴同車身闊度一致，全部都係跑味嘅來源，同時間車身駁口減少，呢種Sensual Purity進一步令外觀更加簡約。
行入車廂，裏面嘅設計都好cyber，成個內櫳呼應車外嘅流線造型，有個長長得嘅出風口橫跨成個錶板頂部，而錶板兩端嘅額外出風口更以噴射筒形狀呈現。簡單來講，EQE嘅設計向前看，唔鍾意食老本。
香港有咩規格揀？
嚟香港嘅主力型號係一換一$768,000起嘅EQE 350+，後輪驅動嘅摩打輸出最大292匹馬力、57.6kgm扭力，90kW電池可以提供654公里續航力（WLTP），係業界少見嘅數字。續航力有6字頭的原因之一係設有三個程度動力回收，Eco Assist模式按當時駕駛情況自動調校最理想嘅回收幅度。
香港馬路淺窄，建議大家可以加option升級到四輪轉向，進一步將迴轉直徑由12.5米減低至10.7米，轉向同一般小型房車一樣輕鬆。
商務使用之餘又想放假爽下，香港仲有性能更高嘅EQE 43 AMG，一換一$1,398,000起。四驅嘅佢可以輸出最多476匹馬力、87.5kgm扭力，0-100 4.2秒搞掂，完全係高性能房跑嘅級別。續航力就比EQE 350+低少少，但都有530公里。
點算一下標準設備先
車長接近5米，車身尺寸同CLS相約，但因為工程師善用電動車空間，車廂長度多過今代W213系E-Class 80mm，前座肩部空間多27mm，腳位落喺E-Class同S-Class之間。
EQE配備最新版本MBUX，有好多user-friendly功能，例如香港路面繁忙，零層功能（Zero Layer）就可以根據情況同環境以最優先嘅方式將最重要嘅應用程式放喺視線範圍內，行車時操作比較快捷安全。
EQE有好多超出唔少傳統汽車嘅體驗。特別一提Burmester環迴音響系統，EQE有兩套Silver Waves同Vivid Flux聲效，等大家操作唔同汽車功能時會有唔同主題嘅聲音——Silver Wave柔和簡潔，Vivid Flux係清脆得嚟溫暖嘅合成聲音，因為車廂真係好靜……
香港馬路又嘈又爛，會有幾靜幾舒服？
EQE將豪華房車嘅舒適性推到另一層次，前四連桿，後多連桿懸掛設計，設計同新S-Class相近，仲可以加option嘅 AIRMATIC氣壓避震，包含ADS+主動吸震系統，乘坐時更感舒適。
隔音其實都一樣，EQE研發時特別重視NVH（noise/vibration/harshness）控制，傳動系統同車身之間有彈性承軸分隔，車架仲加咗特製物料減少傳動系統嘅震動同噪音，務求將摩打、車底甚至車外傳到車廂嘅四方八面震頻滅絕。
全線EQE車系由德國廠房生產，既有EQS打頭陣，EQE呢部中型電動行政房車大有可能為呢個市場建立全新標準。
了解更多：bit.ly/3NkFI0m
