T-Cross的外表的確可愛，關鍵是內在又是否值得愛?
WORDS：YIU TSZ HO / PICTURES：KENJI LEUNG
很重覆的開場白：香港又多一部SUV。我估每一期都用得着這句悶到出汁的介紹，以往有全新車出現點都有少少衝擊，但近年大概十部全新車入面SUV佔了八部，實在幾難覺得興奮。車種比較悶，唯有寄望部車本身不太悶，外形或個性可以有點突破。這部Volkswagen T-Cross，起碼符合到第一點。
4.235米，即是長過4,053mm的Polo，亦只比一部Mk VII的Golf短少少（20mm），不過就高出132mm，身形大概比Audi的Q2漲四分一個碼，比例上短小得來高身，雖然以上所講全都是用MQB底盤，但T-Cross理論上是將Polo泵漲少少再變形而成的crossover。既已有前車可鑑，聽落製法可以好簡單，好在VW沒有採取最即食的悶蛋solution，T-Cross的賣相跟Polo並非千絲萬縷，就算同Touareg或Tiguan等大師兄都有幾大出入。明顯地細crossover普遍主攻stylish區域，你睇Audi Q2、Kia Stonic同Nissan Juke就知，所以必需好好打扮到有自己的個性。車頭兩盞大霧燈的功效好似小丸子塊面那兩個紅色波波，可愛度即時加幾分，由頭燈拉上引擎蓋的兩道深坑亦都幾別緻，車頂有行李架同尾翼仔，車底包圍有防刮物料，加埋屁股的橫條形尾燈，我覺得就算說不上非常靚仔，起碼有好多新鮮感，車頭車尾bulky得來又幾可愛。
至於車廂空間，雖然它的輪軸距同Polo一樣是2,551mm，但我睇落T-Cross大少少，比較接近Golf。原因是後座headroom特別高，細心睇睇天花，就發覺原來有出術，比起接近門框同車尾的地方，座位的正上方，亦即是頭頂對上的天花特別薄身，為熱愛反地心吸力龐克髮型的朋友偷了一截headroom，所以望落比Polo的車廂roomy一點。同一招它也出在相反方向，請將抬起的頭耷低望望地台，同樣偷到很低，因此膝頭彎曲角度可以減少，造成legroom都不差的美麗錯覺。這種設計其實幾聰明，有少少日式家庭車的靈魂，但還未說得上完美，例如對於只有前驅的T-Cross，後座地台中央槽未免太粗，座椅設計比較直，坐姿也略為偏高。幸好你最care大概只是空間的多少，甚至不會太介意後座乘客會不會勞嘈，買得細crossover又有幾可會坐滿人呢？所以，你不妨考慮將後座跣前14cm，以換取最多的尾箱空間，亦即是455公升。就算後座真要坐人而前移座椅被視為不人道行為，尾箱仍可保留385公升儲物量，還是略勝過Golf和Polo分別5公升及34公升。尾箱大過揭背車當然不是很出奇，不過T-Cross還有少少竅妙，首先是地台板的位置有兩層，即放高一點或放低一點都得，另因為離地距比揭背車高，打開之後下面的暗隔都幾多位可用，甚至可以直接將行李簾板收入去，暫時就未見過有揭背車有此功能。
首推出賣廿五萬，不算平亦不覺貴，且看一下有何設備能令人覺得甘心。全電子顯示錶板是standard，8吋的touchscreen也是standard，中控台有略勝過幻彩詠香江的氣氛燈，也有cruise control、自動頭燈及水撥、Qi無線充電、倒車自動煞車和二次碰撞預煞系統等，頭批免費升級到18吋輪圈，比較失色是頭頂無天窗囉。比起見慣見熟的Golf或者Tiguan，T-Cross都叫有新意，兩個大熒幕以外飾板紋路都算新鮮，波棍也是全新款，大銀幕下面有個兜仔可放濕碎雜物，總的來說感覺年輕亦都實用。
一公升三汽缸小引擎前驅車，市面上有Volkswagen Polo、Suzuki Swift、Kia Stonic以及……沒有了。Audi Q2和Ford Fiesta曾經都是一員，不過前者已停售25 TFSI版本，後者直頭整個車系消失於香港。明明這種小turbo引擎最適合大城市用，何以我們只得這麼少選擇呢？我估，可能是造價未必平得過四汽缸好多，既然不是特別平，買盡一點揀1.4或1.5好過的慌死蝕底心態主導了市場。我記得廿年前去日本旅行，汽水機入面有三款紅罐可樂，大中細碼清一色賣¥100，心諗點會有人揀中罐同細罐㗎？事實不過是我太香港人，接受太多俗不可耐又市儈的教育和價值觀，才會理解不了日本人的知足邏輯。Sorry講得太遠，引擎不同可樂，大罐少少同細罐少少的口味不盡相同，關鍵只是差多少和夠不夠飽肚。115匹馬力和20.4kgm扭力，基本上同Polo或者Q2 25 TFSI一樣，今代Polo我只試過GTI版，未接觸過1.0三缸版，問返做過long term test的同事Luby，她說不太覺車頭在怠速時會好震，印象中Q2也沒有這個問題，反而今次試T-Cross，由idling去到低轉區都會感受到前面有輕微震盪，不算很滋擾，對於三缸引擎而言其實屬正路，只不過好奇既然Polo同Q2都克服到一點，何以T-Cross卻不能呢？事實上，論底盤的感覺，T-Cross稍為粗糙少少，隔音功力也不及Polo，以車底傳入車廂的噪音最明顯，時速到85km/h左右風噪亦開始入耳。不過，整體感覺又不是太差，車架還是有相當實在感，跑起來有文有路，重心高度合理，懸掛拿掐得幾好，不會偏軟，行程跟揭背車差不了多少，加上體型都幾compact，基本上已很難分得出是揭背車還是SUV的感覺。引擎固然不是爆炸型，醒神的區域徘徊在中轉速，四千打後就要靠波箱變速保持勢頭，否則搞到爛尾收場亦沒甚麼意思。它的力量和速度雖並不impressive，但不會令人覺得忟已經可以收貨，點講都只是一公升引擎。
想要返揸細車的感覺，但又不想犧牲太多空間，又或者已經厭倦出到第八代的Golf，亦想要少少style，T-Cross該是一個值得看看的選擇，起碼我覺得它好可愛。
原文來自《TopGear極速誌》 2019年12月 第135期
Volkswagen T-Cross 1.0 TSI規格 引擎：999c.c.直三turbo 馬力：115匹/5,000-5,500rpm 扭力：20.4kgm/2,000-3,500rpm 傳動：前輪驅動 7前速DSG 0-100km/h：10.2秒 極速：193km/h* 重量：1,270kg* 體積：4,235 x 1,782 x 1,584mm 油耗：5.0-5.1L/100km 售價：$258,980（早鳥優惠$248,980） *德國官方數據