仲提《侏羅紀公園》？進化了好多好多次啦。
WORDS: YIU TSZ HO / PICTURES: SAM FONG
畀三個關鍵字你，睇睇你會聯想到甚麼：「殘暴」、「速龍」同「1997」……時間到，話明聯想當然無model answer，諗到甚麼視乎你是甚麼人。電影迷的話，應該會諗到Steven Spielberg同埋《迷失世界：侏羅紀公園》，至於既是戲迷亦是車迷的，大概會諗到當年出道的平治M-Class。我見好多行家一講GLE就會講返ML320再講埋《侏羅紀公園》，顯然電影的威力好強大，廿幾年後仲可以令人記得一部車的誕生，以市場學角度看，這一次crossover大概可列入教科書，比起只得強國吸金力卻毫無品味與說服力的Louis Vuitton聯乘Supreme，贏了不只十條街。不過，這種拉扯到陳腔濫調的登場介紹，又好似無創意悶得來其實已無大關係，不止是M-Class已改名換姓至GLE，車架也早已不再是陣式設計，功能性與粗獷味亦都變成講究豪華舒適以及科技法寶的高檔汽車，今時今日問返當年那幾隻恐龍，一定不會認得出GLE原來就是Jeff Goldblum那部ML320的後代。
去到這個年代，推出新一代、甚至全新SUV，都幾難掀起話題，競爭太大。以GLE的級別，除了要面對BMW X5同Audi Q7，仲有Porsche Cayenne、Land-Rover Discovery、Velar、Volvo XC90、Tesla Model X……根本數不完，平治點都要出些新花臣招架，其中一招叫E-Active Body Control。記得九月去法蘭克福車展，在平治的記者會上面睇到一條片幾過癮，有個無得瞓的爸爸抱住個不停喊的BB走入部GLE，之後MBUX幫佢熄暗車燈同播搖籃曲，跟住部GLE好似那些美國改裝車般原地升升降降，變成氹BB瞓覺的車形嬰兒床，有興趣可以去YouTube搜尋「MBUX Baby Protocol」睇睇。雖然主題是講MBUX可以有幾多可能性，不過焦點是這套氣壓懸掛的能力，可以獨立兼大幅度地控制每一組彈簧同避震力道。這套系統的運作跟S-Class那一套Active Body Control類近，屬進化版本，簡單原理是氣壓懸掛內自有另一組液壓氣動系統，由48V電力系統和中央control unit管理，當氣壓懸掛受壓時這組系統會在damper內施加另一道支撐力，平衡damper的運動。部車會視乎driving mode（主要是curve mode和越野用的rocking mode）、行車動態同經鏡頭scan過路面的資訊去分析同作反應，令到車身在彎路同越野環境做到最好的平衡。聽落都幾勁又幾複雜，不過呢……這部demo car並沒有裝上這套新系統，想要的話可以額外加，basic version未連稅都要$83,000。
講返這部GLE 450 4MATIC，是暫時唯一可揀的型號，用三公升直六turbo引擎，有48V mild hybrid同摩打作輔助。引擎本身的馬力為367匹，摩打就額外提供22匹，踩落去力量不算好猛，但勝在夠結實飽滿，一點也不覺車重超過兩噸。摩打出手的動作好低調，sport mode大腳加油介入時不會有突然有人幫拖的感覺，融入得比較smooth，反而起步時就會感受到，當引擎仍在pickup階段的一剎，好明顯有另一種力推動部車，抵消到車重的負擔。這種反應有少少似電動車，可以從容地擺脫靜止，以一部中大型SUV來說都幾實用。GLE 450 4MATIC跑起來的速度其實幾好，0-100km/h都做到5.7秒，但車入面的氣氛經常都好與世隔絕，明明行緊90km/h，會以為自己行緊60km/h，這是高級汽車才會有的特質。雖然我覺得X5好似在寧靜度方面贏半個馬鼻，但GLE的車廂都好靜，最得意是出盡力加速時喉聲似被賴低在後面追緊車的大漢，一直都聽到佢把聲，不過不是太清楚又好遠。整體感覺比較柔和，着重乘坐感和舒適性多於強烈的駕駛感，車身又似是浮在路上面，會有輕而柔的上下左右擺動，從中消化了好多路面瑕疵同帶來的震動，非常舒服。至於司機，一樣會覺得輕鬆，因為車身雖大，但不覺累贅，軚盤輕巧反應快，車頭亦跟得到節奏，行石澳道都無驚過不夠靈活，加上這類車視野固然好，可以想像於長途旅程揸GLE，司機的能量值跌得比揸房車更慢。
另一樣多人關心的是車廂……的最後面，不用再追問喇，有，可以，無問題，七座嘛。睇返option list，加七座要綑綁消費埋中排全電動控制功能以及額外的USB插頭，總數$18,605（未連稅）。中排有電動，上落最後一排不用拉這個手抽扯那個掣，撳一撳就搞掂，前題是你要知撳哪，我就撳來撳去都未搞得清楚怎樣是摺平怎樣是升起移前（但論一頭霧水仍輸BMW X7九條街），如果你買了又玩熟了請再在social media教返我。最後排的空間都是那一句，「臨時」加「小朋友」，只能滿足這兩個條件，不用頂頭和蹲着坐已經謝天謝地。鏡頭pan返去最前排，全新設計，巨型雙芒，中間四個方形冷氣口排排坐，有新的touchpad同軚盤，中央仲有兩個大手抽，睇落每樣都好大件好阻地方，但奇在坐到落去又不覺得壓逼，反而周圍都好鬆動，唯一是近司機左手肘的手抽有時轉急彎會頂手，但平時又可以當手枕墊住抖抖，令人又愛又恨。MBUX的廣東話語音系統比初初試A-Class時反應快了亦更準確，叻過寶馬那一套，不過上不到網點都未夠完善。
有無發覺無講過外形呢？因為說不上大整形，亦好難憑肉眼察覺比上代長了105mm，其實wheelbase都加到去近3米（2,995mm，多了80mm），不過整體形狀都沒有很大差異。但這樣更好，好過變到似GLC，不是話GLC不好看，而是GLE這種形態比較剛毅，我亦都喜歡它保留C柱和D柱中間的側窗。最後講多兩個比以前叻的地方，第一，今代的風阻系數由Cd 0.32降到Cd 0.29，屬同級車之中最低。第二是車身用了好多輕量物料，有不同類型的鋁以及車頭的organo（用纖維強化的塑膠，優點是輕、硬、易成形），令車身抗扭性比上代提升了20%，車頭的crash performance都有增強。
原文來自《TopGear極速誌》 2019年12月 第135期
Mercedes-Benz GLE 450 4MATIC規格 引擎：2,999c.c. 直六turbo 馬力：367匹/5,500-6,100rpm 扭力：51kgm/1,600-4,500rpm 馬達馬力：22匹 馬達扭力：25.5kgm 傳動：四輪驅動 9前速自動波 0-100km/h：5.7秒 極速：250km/h 重量：2,220kg 體積：4,924 x 1,947 x 1,772mm 油耗：8.3-9.4L/100km（NEDC）* 售價：$879,000 *官方數據