萬事得上年宣佈將展開經典車款MX-5 Roadster復修計劃，踏入2018年，計劃正式啟動。廠方開始接受車主預約，亦開始落實更多詳細資料及套餐定價，今年一月亦舉辦多場解說會，介紹計劃細節。
萬事得取得由國際評測機構TÜV Rheinland發出的Classic Car Workshop Certification認證，確認經此工場修復的MX-5 Roadster符合國際經典車的標準，可以說是公信力和身價的保證。在萬事得公佈的復修細節中，可見車廠處理程序嚴謹。所有申請車主需先將座駕送往萬事得指定檢測部門，確認車輛本身結構完整，並非重大事故車或不適當改裝車。通過檢測後，車廠會安排把車輛送到萬事得位於廣島的E&T（Engineering & Technology）工場展開工程。基本車身修復工程耗時約兩個月，由專業技師以人手完成分解、除鏽、清潔、噴塗和組裝工序，所有規格完全按照新車出廠標準，車身顏色亦只限紅、藍、白、銀灰、綠，黃及黑七個原裝色，忠於原著嘛。除此之外，萬事得更安排重新投產約150項原裝零件，包括車頂軟篷、Nardi桃木軚環等，就連輪胎亦找石橋重新以現今技術及物料，復刻生產一批式樣尺碼與原裝胎一模一樣的SF325輪胎，這批復刻版原裝零件除供復修車輛使用外，亦會獨立售予MX-5 Roadster車主。更誇張的是，復修工程期間車主可預約造訪工場，實地了解愛駒復修過程，日本人果然零舍貼心。
好啦，最後當然要講講價錢。基本車身外裝復修套餐盛惠250萬日圓，已包括車身修補、全車起底翻噴油、更換沙板、頭尾燈、水撥及車頂軟篷等物料，以原廠零件加人工來說一點也不貴，而其他選配套餐包括車廂裝置、機械傳動、底盤裝備、空調設備及輪框輪胎等，約20萬至80萬日圓，都在可接受範圍。原廠服務加合理價格，即時覺得MX-5 Roadster車主好幸福，不過留意返，這個計劃僅日本車主限定。除非你有辦法運車到日本，再安排所有手續，咁就唔同講法啦。