SUV本來就是貴乎大，現在卻又愈縮愈細。Q2、GLA、XV、CX-3、Countryman和Juke，這六部迷你SUV/crossoover究竟可否憑半肥瘦體積及騎牆派售價，成功拉籠傳統高脂SUV及排骨揭背車的忠實顧客？
Edmond：Edmond Lau（TopGear總編輯）
安：歐陽國安（TopGear副總編輯）
姚：姚子浩（TopGear高級編輯）
安：1.0三汽缸引擎一直是發育不健全心臟，大都只限在發育不健全的兒童中存活。把1.0這個幼兒器官移植在SUV或crossover？有沒有人數得清當Q2 1.0公升版爬上山時，總共會被幾多部車爬頭？
姚：三位數字的引擎容積（999c.c.），除了日本k-car平日好少接觸，VW集團的這副引擎在歐洲都用了好一排，家陣終於到香港，總叫多個選擇。其實放在Q2，都未至於充撐不到場面，低轉引擎比較郁身郁勢、高轉比較嘮嘈都預計得到，但又不至太擾民，我覺得完全可以接受。跑起來，上山被其他車爬頭的數目呢，我的成績是零。
安：我知我知，因為你根本上不到山。其實我在亂講，幾年前在歐洲連續髮夾彎的山路開A1 1.0手波，如果前面有幾部從Avis租賃而來的economy class車仔，我有自信一分鐘之內可以爬頭幾次。不過前提是A1以及棍波，自動波Q2嘛……
Edmond：我唔擔心佢唔夠力喎，細引擎，動力少，天公地道，問題係波箱夠唔夠醒目，識唔識得努力工作。
姚：A1比較輕當然會着數，手波我都想Q2會有，不過7前速的S tronic有幾醒我估你們都清楚。雖然116匹及20.4kgm的引擎不算大力，不過波箱是它的體貼伴侶，好識得幫手隱藏缺點，絕大部份情況都好快揀到個最好的波段，上上落落勤力又爽手。唯一D波起步動作時會慢少少，因為引擎都有少少turbo lag。欠耐性的、想一綠燈就第一個衝出去的、趕住9:15pm前買六合彩的，用S波起步就可圓滿解決。
安：好的，我信你。不過信你都無用，我估好多用家覺得買部微型SUV或crossover，着眼點根本並非爬頭衝燈去買六合彩，而是價錢公道+實用+我溫柔但不很醜。Q2的致命傷很明顯在於標價，1.4版34萬，同一引擎的A3 Sportback只是27萬幾。
姚：貴？1.0版2字頭喎，28萬，Countryman和GLA知道「2」字怎樣寫嗎？
安：何解1.0與1.4差六萬？？？？因為1.0的車轆和擋風玻璃是選配設備嗎？
姚：因為……引擎細之餘，driving mode、天窗、泊車鏡頭、雙區冷氣、免匙啓動、電動皮櫈等等全都沒有，是真真正正的素食者，俗稱齋版。
Edmond：嘩？仲有的是甚麼？
姚：都有好多USB插頭，前後有四個，至於自動水撥頭燈和電摺鏡都總算健在。
安：好的，即是有車轆和擋風玻璃。對我個人來講——這個「個人」相信同不少crossover的用家一樣，單身、想買部放得入運動器材、可以在郊區上壆的車仔，起碼你形容的Q2全不影響我，而且現今三十萬樓下的歐洲車（不單只SUV）已經所餘無幾。如果計設備，Q2最難能可貴是車身明明只大過Juke一丁點，但行李箱卻忽然大了一個碼，面積同Countryman和CX-3近乎一樣。但有借必有還，咪畀錢中介，你看後排的椅背，那是兼用為火箭發射台嗎？幹嗎近乎垂直向天的？
姚：Q2的行李箱算好四正，不過後座就不比A1好很多，空間是有限公司，腰又要挺好直。三部歐洲車中它是最有蝸居味的，GLA好些少，Countryman才算有人性。
Edmond：等陣！聽大家數來數去都是講設備、計實用，快悶死我了。一部Audi如果只在乎設備，坐入裏面豈不好似入了佛院齋堂，大家清心寡欲，叫人唔好諗咁多嘢？即係一個字：悶？
姚：悶嗎？都有少少，雖然設備少，但眼見的還是Audi的設計，又未至於齋到以為它是一部Polo。廿多萬的Audi雖然設備不多，但好靚仔（我覺得），1.0引擎都夠日用，相信油耗都不會高（官方是5.1L/100km），入門定位清晰易接受。我想問同樣是三汽缸引擎，Countryman的1.5L turbo滿足到你嗎？